domingo, 23 de outubro de 2011

Alerta



Remata a semana e parece que nos meteron de cabeza no inverno. Alerta laranxa, dicía o periódico, na nosa zona. Vento, chuvia, frío que un non necesitaba aínda, todo xunto nun día para gozar das inclemencias meteorolóxicas, por se se botaban en falla.

É ben certo que tódalas estacións son fermosas, traéndonos nos seus cambios sensacións e emocións doutro xeito inaccesibles para nós. Parte da universalidade da nosa terra reside nos nosos cambios estacionais. Claramente.






Avivecen as fontes deste outono

con plantas a olleceren coma pan

de forno acabando de cocer

pervivencias de lumes incendiarios.


Renacen intereses repisados
cal muros que conquistan máis firmeza
no abrigo agarimoso contra o vento
xerándolle socairos aos camiños.


Percíbese fecundo o que ha de vir
no galano innegable do desexo
acomodando tempo e estación.


Goberna decidido o corazón
arrombando de novo o latexar
coas forzas que promoven as paixóns.








.

3 comentários:

  1. Aquí, no norte, hai dúas semanas que nos colexios xa é obligatorio levar gorro. Aínda é cedo e non vai moito frío, pero resulta que así evitan situacións nas que os máis delicados enferman intentando ser tan "atrevidos" (por dicilo así) como os que aínda levasen a cabeza descuberta. Parece unha precaución interesante, por si non chega co sentido común :)

    ResponderEliminar
  2. O que dis vén a demostrar que os nórdicos son países evolucionados. Saben que a cabeza é o mellor que posúen e non lles queda máis remedio que protexela. Supoño que as cabezas importadas tamén andarán protexidas, e se non andan que se protexan, din ao meu lado.

    ResponderEliminar
  3. Quedade tranquilos por aí, que co que lles gusta a algunhas cabezas importadas presumir de gorro, non han pasar problema ningún :)

    ResponderEliminar