Pensamentos

Edison dicía que cultivar o hábito de pensar proporcionaba un dos maiores praceres. É posible, a estas alturas eu xa non aseguro nada. De todas maneiras, estiven probando a pensar un pouco (sen cansarme, a verdade) no que lle pasa ao noso país nisto dos nosos partidos políticos e dos seus dirixentes, e non me prougo nada, nin o que lía, nin o que entendía. Vai ser que Edison falaba de pensar noutras materias.

Co paso do tempo pódese chegar a querer o que un fai, nun xeito de simbiose que axude á supervivencia mental. Incluso chegados á idade na que non admitimos moitas máis cousas das que nós mesmos pretendemos facer, podemos acabar querendo o noso rutinario traballo, e obtendo así a felicidade precisa para incorporalo ao noso feito vital.  Ata tamén coas persoas que se nos van incorporando á existencia e ao corazón.

Mirándome no branco do teu peito

descanso da visión erma da terra

e sei que así renacen esperanzas

á ansia de fartura cando axexa.

Abrázasme, amante xenerosa,

na entrega que se achega sen reparo

nos cálidos alentos que acarician

na luz das túas mans que son amparo.

Regálome na fala do futuro

sentíndome na vida do teu ventre

con calmas escoitadas nos latexos

gozadas como fin agora, sempre...

E sobran as palabras por ruídos

e vívese amizade no silencio.

.